“კიდევ ერთი კარგი სიახლე გვაქვს – დათიკომ ეტლზე ჯდომა შეძლო”

თბილისში, შარტავას ქუჩაზე მომხდარი ავტოსაგზაო შემთხვევის შედეგად დაშავებული 8 წლის დათი ქოქრაშვილის დედა, მოზარდის ჯანმრთელობის მდგომარეობის შესახებ ახალ დეტალებს ასაჯაროებს.

როგორც ქრისტინე მამუკაშვილი ჟურნალ „თბილისელებთან“ ამბობს, დათიმ ეტლზე ჯდომაც ისწავლა.

როგორც გვეუბნებიან, სექტემბრის დასაწყისში გამოგვწერენ.

კიდევ ერთი კარგი სიახლე გვაქვს – დათიკომ ეტლზე ჯდომა შეძლო. ამ მომენტის ყველას ძალიან გვეშინოდა. გვეგონა, ამხელა ჭრილობით ვერ დაჯდებოდა, მაგრამ იმდენად მონდომებული იყო, მაინც შეძლო. ერთ საათზე მეტხანს ვერ ძლებს. ტკივილები ეწყება, მაგრამ ესეც ბევრს ნიშნავს. უნდა გენახათ, როგორი ემოციური იყო ის მომენტი, როცა პირველად დაჯდა. ძალიან ბევრი იტირა და მერე ამბობდა, აქლა მივხვდი, რა არის სიხარულის ცრემლებიო. თვითონაც და ჩვენც ყველანი სიხარულით ვტიროდით“.

ქრისტინე „თბილისელებს უყვება, თუ რა გეგმები აქვს დათას მომავალში.

„ძალიან პოზიტიური ბიჭია. იმდენად მხიარულია, მნახველები რომ მოდიან, გაოცებულები არიან, მუსიკას ჩაგვართვევინებს და ცეკვავს.

ჩვენც ვეხმარებით, სულ ვცდილობთ, მხიარულად იყოს და მოწყენისა და ბევრი ფიქრის საშუალება არ მივცეთ. სკეიდბორდი და ველოსიპედი უყვარს ძალიან. დავპირდი, რომ რაღაც პერიოდის შემდეგ ველოსიპედს აუცილებლად გაატარებს. უნდა, რომ გაიზრდება, მსახიობი გახდეს. თავის მსახიობურ ნიჭს უკვე იყენებს და ხანდახან ექიმებს აშინებს. თვალებს გადაატრიალებს, ვითომ ცუდად გახდა და ექიმები დაფეთებულები უყურებენ. გვიმტკიცებს, რომ კარგი მსახიობია,“ – ამბობს ქრისტინე მამუკაშვილი.