“მადლობა, რომ საკუთარი ქვეყნიდან მაძევებთ!”
საბერძნეთში ჩატარებული კონცერტის შემდეგ ანიტა რაჭველიშვილს იტალიის ქალაქ ნეაპოლში, სან კარლოს თეატრში ჰქონდა კონცერტი.
რამდენიმე საათის წინ კი მეცო-სოპრანომ “ფეისბუქზე” პოსტი გამოაქვეყნა, საიდანაც ცნობილი ხდება, რომ 10 აგვისტოს მომღერალი სამშობლოში უნდა დაბრუნებულიყო, თუმცა დაწესებული საკარანტინე რეგულაციების გამო, რაჭველიშვილმა გეგმა შეიცვალა. აი, რას წერს ანიტა.
“10 აგვისტოს უკვე სახლში უნდა ვყოფილიყავით! ორი კვირა თვითიზოლაციაში გაგვეტარებინა სახლში, სადაც მხოლოდ მე, ოთო, ფრენკი, სუზი და ბევრი ეზოს კატა ცხოვრობს! ტესტი უნდა გაგვეკეთებინა საკუთარი ხარჯებით, თუნდაც ყოველ დღე ამ ორი კვირის განმავლობაში, რათა დავრწმუნებულიყავით, რომ არ გვაქვს კოვიდი.
2 კვირიანი იზოლაციისა და კოვიდის ტესტის მერე მინდოდა კონცერტი ჩამეტარებინა ჩემი საყვარელი მსმენელისთვის “უღრან ტყეში”, სადაც ბოლო დროს ულამაზეს საღამოებს მართავენ მუსიკოსები.
ეს ყველაფერი არ გამოვა, სამწუხაროდ, რადგან არ ვარ თანახმა, რომ ჩემი უფლებები ირღვეოდეს და რაღაც სასტუმროს ერთ პატარა ოთახში გამოვიკეტოთ თავი მე და ჩემმა მეუღლემ ფრენკის გარეშე და კაცმა არ იცის, რა პირობებში. არ ვარ თანახმა, რომ გავრისკო კარანტინში, დაავადების რისკი იქ უფრო დიდია ასე მგონია!
თვითიზოლაცია ჩვენს საკუთარ სახლში, სადაც კამერები დგას და შეძლებდნენ გაეგოთ, რომ ნამდვილად არსად არ გავდგამდი ფეხს, თუმცა გადაწყვიტეს, რომ საკუთარ ქვეყანაში არ უნდა დავბრუნდე! ჩემს საყვარელ საქართველოში! და იძულებული ვარ დავრჩე იქ, სადაც ვარ ახლა!
მადლობა საქართველოს მთავრობა, რომ საკუთარი ქვეყნიდან მაძევებთ!
დიქტატურის უმაღლესი ფორმაა ეს!”