„90-იან წლებში, წვეულების შემდეგ, ხვიჩას ვიღაც ბიჭებმა დაუძახეს.. ცოცხალს ვეღარ მივუსწარით“

მომღერალ ხვიჩა ხოჯავას გარდაცვალებას ჟურნალისტი მაკა რაზმაძე სოციალურ ქსელში ემოციური პოსტით ეხმაურება. როგორც მაკა რაზმაძე წერს, 90-იან წლებში ერთი ბიჭი მოსწონდა, რომელსაც ხვიჩა ხოჯავა ერქვა, თუმცა, ერთ საღამოს წვეულების შემდეგ მოკლეს.

მაკა წერს, რომ წლების შემდეგ ხვიჩას დას ბიჭი შეეძინა, „მეუღლე დაიყოლია და ასე გაჩნდა კიდევ ერთი ხვიჩა ხოჯავა“.

„ადრე, 90-იანებში ერთი ძალიან სიმპათიური, ძალიან კეთილი ,ძალიან ვაჟკაცი და ყველანაირად არაჩვეულებრივი ბიჭი მომწონდა. რომანი არ გვქონია, თბილი ურთიერთობა გვქონდა დიდი პატივისცემით. ხშირად ვიყავით ერთად მეგობრების წრეში.

ხვიჩა ხოჯავა ერქვა.

მერე ერთ დღეს, როცა მეგობრები მორიგჯერ შევიკრიბეთ და წვეულების შემდეგ ეზოსთან გამოვედით ხვიჩას ვიღაც ბიჭებმა დაუძახეს იქვე ქუჩაში. გავიდა და მალევე სროლის ხმაც გაისმა. ცოცხალს ვეღარ მივუსწარით. დეტალებს აღარ მოვყვები მერე რა მოხდა. ეს საკმაოდ გახმაურებული ამბავი იყო მაშინ. შემდეგ დრო გავიდა და ხვიჩას დას ბიჭი შეეძინა. ხვიჩა დაარქვა. მეუღლე დაიყოლია და ასე გაჩნდა კიდევ ერთი ხვიჩა ხოჯავა-მასავით სიმპათიური და საყვარელი…

დღეს კი უკვე მეორე ხვიჩა ხოჯავას სიკვდილის შესახებ გავიგე… გამაგრდი, მანანა… სხვა რა უნდა ვუთხრა ასეთი შვილის დამკარგავ დედას არც ვიცი…“, – წერს მაკა რაზმაძე.