ნიაზ დიასამიძის არჩევანი კვლავ ქართულ სიმღერებზე შეჩერდა – ვინ გადავიდა ფინალში მისი გუნდიდან

არ არის გასაკვირი, რომ ნიაზ დიასამიძემ თავისი ოთხეულისთვის ნახევარფინალურ ტურში კვლავ ქართულ რეპერტუარზე გააკეთა აქცენტი. მათ შორის ხატია ქინქლაძის შემთხვევაში არჩევანი ისევ ახალ, კონკურსანტის მიერვე დაწერილ კომპოზიციაზე შეჩერდა, რომლის შესრულებაშიც მენტორი ხატიას ისევ თავად დაეხმარა. ლუკა ლილუაშვილმა ,,გელინოს” ახალი ვერსია წარმოგვიდგინა, შთამბეჭდავი იყო სალომე ხუჯაძის ,,მოვა მაისი”, რომელიც აკაპელაში ანსამბლ ,,იალონის” დახმარებით შეასრულა, ანი ტაბაღუამ კი – “გამარჯობა, ჩემო თბილის-ქალაქო” შეარჩია, ნიაზის თხოვნით.

მაყურებელმა ამ ოთხეულში უპირატესობა ლუკა ლილუაშვილსა და მის შესრულებას მიანიჭა, ნიაზმა კი თავისი გადაწყვეტილება გამოაცხადა.

ნიაზ დიასამიძე:

,,აღარ დავიწყებ ბევრ ლაპარაკს, ასეთია და ისეთია-მეთქი. სამი ფერია მუსიკალურად და პრაქტიკულად, ყველა გუნდში ასე მოხდა, რადგან ნახევარფინალში შემთხვევით არ მომხდარა. ახლა მე უნდა ვიფიქრო იმაზე, ბოლოში რა ფერები გვინდა… თორემ ასე პიროვნულად მეგობრები ვართ ყველანი… ვიცი, რომ ბევრს ვლაპარაკობ… მოკლედ, ავდგები და… ნაღდად სამივე მინდა იყოს ყოველთვის გამარჯვებული, მაგრამ დავტოვებ ხატიას, რადგან წავყვები პირველ ლოგიკას, თუ რას ვაპირებ ხვალ…”