„ჩემმა ქმარმა გადამარჩინა. წელს ქორწინების 25 წლისთავი გვაქვს და თავიდან უნდა გავყვე ცოლად…“

თინა ხიდაშელი კორონავირუსისგან გამოწვეულ უმძიმეს გართულებებს დღემდე მკურნალობს. ჟურნალ „სარკეს“ ის გულახდილად ესაუბრება და აღნიშნავს, რომ ის, რომ ბრძოლას თავი არ დაანება, სრულად მისი ქმრის, დათო უსუფაშვილის დამსახურებაა. ის ხუმრობს, რომ 25 წლის ურთიერთობის თავზე მას ცოლად თავიდან გაჰყვება.

თინა ხიდაშელი:

„ჩემმა ქმარმა გადამარჩინა. წელს ქორწინების 25 წლისთავი გვაქვს და თავიდან უნდა გავყვე ცოლად… ის რომ არ ყოფილიყო, შეიძლებოდა, მარტივად მიმენებებინა თავი ბრძოლისთვის. საავადმყოფოში ისევ ის დათო ვიპოვე, 1993-95 წლებში რომ შემიყვარდა და რატომაც გავყევი ცოლად. ოქტომბერში თავიდან გავყვები ცოლად და ისევ თავიდან დავიწყებ.

დედაჩემს ჩემი ცრემლები არ უნახავს, არავის ვუნახივარ ცუდად მყოფი, როგორ ცუდადაც უნდა ვყოფილიყავი, არასდროს არავის ვაძლევ უფლებას, რომ შევეცოდო. თურმე მან ეს ყველაფერი კარგად იცის, ბოლომდე იცის და არ მომცა უფლება, ვინმესთან დისკომფორტი შემქმნოდა. მასთან მოხდა ეს ყველაფერი და შესაბამისად, საავადმყოფოში, ექიმთან, ექთანთან ურთიერთობა მარტივი გახდა. დათო რომ არა, მე ვერ გამოვიდოდი იქიდან ცოცხალი…“