“სადმე გინახავთ რესტორნის მეპატრონე გამოსულიყოს და ემღეროს?“ – როგორ ხვდება თბილისის ერთ-ერთი ვინტაჟური კაფეს მეპატრონე სტუმრებს (ვიდეო)

სოციალური ქსელი თბილისში, ერთ-ერთ ღია კაფეში გადაღებულმა ემოციურმა ვიდეომ მოიცვა – კადრები ვერცხლის ქუჩა #52-ის იტალიურ ეზოში მდებარე ერთ-ერთ ვინტაჟურ კაფეში – Musa Tbilisi-შია გადაღებულია.

კაფეს მეპატრონე, ზუტა ძიძიგური აკომპანემენტის თანხლებით, სტუმრების წინაშე გამოდის და შესანიშანავად ასრულებს სიმღერას „O Sole Mio“.

ვიდეოს სოციალურ ქსელში აქვეყნებს ზუტა ძიძიგურის და, მარიამ ჩაჩუა და წერს:

„ჩვენი ეზო, თბილისური, ეკო-მეგობრული, მყუდრო და თან ძალიან მხიარული. ბრავო ჩემს ძმას თავდაუზოგავი შრომისთვის, რომელმაც ჩვენი ბავშვობის მოგონებების ადგილი ვინტაჟურ კაფედ და ძველ თბილისში ერთ-ერთ ყველაზე გამორჩეულ ადგილად აქცია“, – წერს მარიამ ჩაჩუა.

როგორც მარიამი „ფორტუნას“ უყვება, და-ძმა სწორედ ამ ეზოში გაიზარდა, გასულ წელს კი ზუტამ ეზო საკუთარი ხელით გადააკეთა და ვინტაჟურ კაფედ აქცია.

ზუტა ოპერის მომღერალია, მას მილანში, ვერდის კონსერვატორია აქვს დამთავრებული.