“გთხოვ ნეკა! სარჩელი უკან გამოიტანო, ვიცი საშინლად გიყვარდა ნიკა”

„წერილი ნეკას (Neka Dorokashvili)

შენი ყოფილი მეუღლე ნიკოლოზ ბასილაშვილი 18 წლის იყო, როცა გავიცანი. ნიკა და მისი ძმა თენგო ჩემი სულიერი შვილები გახდნენ. ნიკას რუსეთის და ამერიკის შემდეგ სულიერი პრობლემები ჰქონდა. მატერიალურად ძალიან უჭირდა. იყო შემოთავაზები რუსეთიდან, არაბთა გაერთიანებული საამიროებიდან: უზარმაზარი ფულით და დაფინანსებით, ერთი პირობით: ნიკას უნდა მიეღო მოქალაქეობა რუსეთისა, ან არაბეთისა და ა.შ. ნიკამ ყველაფერზე უარი თქვა, არ უღალატა სამშობლოს და აგრძელებდა მშობლების სახლში – ავჭალაში, პატარა ასფალტზე კედელთან ვარჯიშს.

პარალელურად დადიოდა სამებაში, იდგა წყნარად სადიაკვნოში, ეზიარებოდა და ყველასათვის უცნობი მიმყავდა და უწმიდესს ილია მეორეს ვეუბნებოდი: დალოცეთ თქვენო უწმიდესობავ! ეს არის მომავალი საქართველოს დიდებისა და პატრიარქიც ლოცავდა. ეს მიყვანა და დალოცვა ყველაზე ცოტა ხუთჯერ მოხდა.

15 ივლისს ჩანიშნულია სასამართლო. გთხოვ ნეკა! სარჩელი უკან გამოიტანო, ჯვრისწერისას გვირგვინი მე დაგადგი, დარჩი ლუკას დედად, ვიცი საშინლად გიყვარდა ნიკა, ნუ ბოროტებით, ეს ღვთის რჩევაა, სიყვარულით დაიბრუნო შენი სიყვარული. ერთი წამითაც არ იფიქრო, რომ ეს შეკვეთილი წერილია, მე რომ შეკვეთილებს ვასრულებდე, დედამიწაზე არ ვიქნებოდი ბერთა შორის უღარიბესი ბერი,“ – წერს არქიმანდრიტი ანთიმოზ ივერიელი“.

ცნობისთვის,  ჩოგბურთელი ნიკოლოზ ბასილაშვილი 21 მაისს დააკავეს, არასრულწლოვანი შვილის თანდასწრებით ყოფილ ცოლზე ფიზიკური ძალადობის ბრალდებით. იგი სასამართლომ 100 000 ლარიანი გირაოს სანაცვლოდ გაათავისუფლა. სასამართლო სხდომა 16 ივლისს გაიმართება.