ცნობილი ჟურნალისტი და ტელეწამყვანი ანა შამილაძე საავტორო გადაცემაში „ანა-მარია“ ამჯერად სტუმრის ამპლუაში წარსდგა. გადაცემის მსვლელობისას მან ყურადღება ოჯახზე, ადამიანურ ურთიერთობებზე და იმ ფუნდამენტურ მოტივებზე გაამახვილა, რის გამოც ქალისა და მამაკაცის გზები იკვეთება.
როგორც ტელეწამყვანი აღნიშნავს, თანამედროვე რეალობაში, სადაც ქალები სრულად ახერხებენ ფინანსური დამოუკიდებლობის მოპოვებას და კარიერულ განვითარებას, ურთიერთობების ბუნება და პრიორიტეტები ფუნდამენტურად შეიცვალა.
„გავაცნობიერე, ზოგადად, ქალს რისთვის სჭირდება მამაკაცი – არანაირი ვალდებულებების, არანაირი სხვა მიზეზების გამო. ერთადერთი მიზეზი, რისთვისაც ქალს სჭირდება მამაკაცი, არის ის, რომ უბრალოდ აი, ეს სიყვარული ატაროს მამაკაცის მიმართ, სხვა არაფრისთვის.რომ მუდმივად იყო სიხარულში და როცა სიყვარულში ხარ, ავტომატურად ყველაფერი ლაგდება. არ არსებობს ვალდებულებები და კონკრეტული მიზეზები, ეს არაფერ შუაშია ქალისა და მამაკაცის ურთიერთობასთან“, – ამბობს ანა შამილაძე.
მისი თქმით, მთავარი განმსაზღვრელი მუდმივად სიყვარულის მდგომარეობაში ყოფნაა, რადგან ამ გრძნობის არსებობისას ცხოვრებაში ყველა სხვა დეტალი თავისთავად ლაგდება. ტელეწამყვანი მიიჩნევს, რომ ყოველგვარი ხელოვნური ვალდებულება თუ პრაგმატული მიზეზი, რომლებითაც ხშირად წყვილები ხელმძღვანელობენ, ჯანსაღ და ბუნებრივ ურთიერთობებს გამორიცხავს.