„სიკვდილს გადავურჩი… მხედველობა წამერთვა და თვალების ოპერაცია ლელა წურწუმიამ და ნოდიკო ტატიშვილმა დამიფინანსეს…“

ცნობილ რეჟისორს, კლიპმეიკერს, რომელსაც არაერთი ქართველი ვარსკვლავის ვიდეო აქვს გადაღებული, წინა წლის იანვარში კოვიდი დაუდასტურდა. ნესტან სინჯიკაშვილს დიაბეტი აქვს და შეძლებისდაგვარად, ერიდებოდა ვირუსს, ყველანაირად იცავდა თავს, მაგრამ ბოლოს მას და დედამისს კორონა ოჯახის წევრისგან გადაედოთ.

მალე ნესტანი მიხვდა, რომ სუნთქვა უჭირდა და ის ლევან რატიანის განყოფილებაში დააწვინეს. რეჟისორის მდგომარეობა უარესდებოდა – „ჩამესმოდა ხმები, როგორ უნდოდათ ჩემი ხელოვნურ სუნთქვაზე გადაყვანა… და მე ხელით ვანიშნებდი, არ მინდა, მე თვითონ ვიბრძოლებ-მეთქი… ყოველდღე, რეანიმაციაში ვხედავდი, როგორ აფარებდნენ ზეწრებს ადამიანებს და გაჰყავდათ გარდაცვლილები, ახალგაზრდებიც, მათ შორის… ჩემმა ახლობლებმა ბევრჯერ გამომიტირეს…“

ნესტანი გადარჩა… როგორც თვითონ ამბობს, შესანიშნავი ექიმების, მეგობრების და ახლობელი თუ არცთუ ახლო ადამიანების გულშემატკივრობითა და წყალობით. 

ახლა რეაბილიტაციის რთულ პროცესს გადის. თავიდან ისწავლა სიარული… კორონავირუსით გამოწვეული მხედველობის სრული დაქვეითება თვალების ოპერაციამ გამოასწორა, რომელიც მეგობრებმა – ლელა წურწუმიამ და მამულიჩამ, ნოდიკო ტატიშვილმა და ნინო ფირცხალავამ დაუფინანსეს. „ახლა ვხუმრობ, ერთი თვალი იყიდეს მამულიჩამ და ლელამ, მეორე თვალი ნოდიკომ და ნინომ… არ მინდოდა, მაგრამ ძალით გადაიხადეს… რანაირი მეგობრები მყავს…“