ვინ აჩუქა საკუთარი სახელობის ვარსკვლავი თათო გოგოლაშვილს და როგორ დაეხმარა ის თავის დაბადების დღეზე მიწისძვრით დაზარალებულ სირიელ და თურქ ბავშვებს

თათო გოგოლაშვილი: ყოველთვის მშვიდი, გაწონასწორებული და კარგი ხასიათის ბავშვი ვიყავი. სკოლაში საუკეთესო მოსწავლედ ვითვლებოდი და უნივერსიტეტშიც წარმატებული სტუდენტი ვიყავი.

– როგორც ვიცი, ბავშვობიდან გემოვნებიანი ჩაცმით გამოირჩევი, გიყვარს ფერების შეხამება. რატომ აირჩიე ჟურნალისტიკა და არა დიზაინერობა მომავალ პროფესიად?

– კავკასიის უნივერსიტეტში დავამთავრე ჟურნალისტიკისა და მასობრივი კომუნიკაციის ფაკულტეტი. ახლა მაგისტრატურაში ჩაბარებას ვაპირებ. ზოგადად, კარგი ხედვითა და აღქმით გამოვირჩევი. მიყვარს გემოვნებიანად ჩაცმა და ყოველთვის განსხვავებულად მეცვა. სხვათა შორის, მომწონს ბრენდული ტანსაცმელი. ვცდილობ, ხშირად შევიძინო ქართველი დიზაინერების სამოსი. ქართული ბრენდების ტანსაცმლის მოდელიც ხშირად ვარ. ერთი პერიოდი მინდოდა დიზაინის კუთხით წასვლა. მამა ადრე გარდამეცვალა და მამობა თბილისში საუკეთესო არქიტექტორად აღიარებულმა, ცნობილმა გოგა ჩხეტიამ გამიწია. ხშირად მამეცადინებდა გეომეტრიაში. მეუბნებოდა: შენ რაც კარგად გამოგდის, იმ კუთხით უნდა წახვიდეო. მისი რჩევით, ჟურნალისტი გავხდი და ჩემი სპეციალობით სხვადასხვა ტელევიზიაში ვმუშაობდი, ასევე, ჟურნალშიც. როგორც მოდელი, მონაწილეობას ვიღებ გადაღებებში. სხვათა შორის, ბავშვობიდან მეუბნებოდნენ, სამოდელო სფერო შენიაო, მაგრამ ეს პროფესიად არ ამირჩევია, თუმცა, ბედი ვცადე. სულ დაკავებული ვარ. დედა საუკეთესო ივენთმენეჯერია და დღეს მეც ამ სფეროში ვმუშაობ პრომოუტერად. ძალიან მიყვარს მოგზაურობა, თითქმის მთელი ევროპა მაქვს მოვლილი, 12 ქვეყანაში ვარ ნამყოფი. ოჯახთან ერთად, სამი თვე, პარიზში ვცხოვრობდი და ის დღეები წარუშლელ მოგონებად დარჩება. თუმცა, პარიზში, ამას გარდა, სამჯერ ვარ ნაყოფი, ჩემი საყვარელი ქალაქია.

– თათო, წელს, შენს დაბადების დღეზე, საოცარი ქველმოქმედების საღამო მოაწყვე. იქნებ ამაზე მოგვიყვე?

– ძალიან ძლიერი ადამიანი ვარ, თუმცა სენსიტიური ვხდები, როცა საქმე ბავშვების გაჭირვებას ეხება და ვცდილობ, დავეხმარო. პირველი ჩემი ქველმოქმედება იყო უკრაინელი ბავშვებისთვის გადარიცხული თანხა. მინდოდა, ისეთი დაბადების დღე მომეწყო, რომლითაც მიწისძვრით დაზარალებულ ბავშვებს დავეხმარებოდი. 26 წლის იუბილეზე წვეულება საკუთარ სახლში მოვაწყვე. მოწვეული მყავდა მეგობრები და იმ ომის ფონზე, რომელიც ქვეყანაში მიმდინარეობს, უარი ვთქვი „აქსის თაუერსის“ 36-ე სართულზე „პულმან ბარის“ დახურვაზე და ივენთის ჩატარებაზე. სახლში, დაბალ ხმაზე იყო მუსიკა ჩართული და ასე გავერთეთ მეგობრები. გავაკეთე „ჩერითი“ ყუთი, უფრო სწორად, კონვერტი და შემოწირული თანხა სრულიად ჩაერიცხათ მიწისძვრით დაზარალებულ, სირიელ და თურქ ბავშვებს. ვინც ვერ მოვიდა, თანხა ჩამირიცხა და მეც დავამატე, თურქეთის საელჩოს ანგარიში გამოვართვი და შეგროვილ, საკმაოდ სოლიდურ თანხას თურქეთის დახმარების ფონდში გადავრიცხავ. ჩემი დაბადების დღის საღამო კი ლამაზი ფეიერვერკით დასრულდა.

– მეგობარმა ორიგინალური სიურპრიზი გაგიკეთა და ახლა ცაში შენი სახელობის ვარსკვლავი ანთია. ეს როდის მოხდა?

– დიახ, ახალ წელს მეგობარმა ორიგინალური საჩუქარი-სიურპრიზი გამიკეთა. მოვიდა და მითხრა: „შენ ხარ ვარსკვლავი და შენი სახელობის ვარსკვლავს იმსახურებ!“ ანუ, მიყიდა და მაჩუქა ვარსკვლავი, რომელიც ახლა ცაში კაშკაშებს. ადრე მქონდა გაგონილი, ერთმა ბიჭმა გოგოს აჩუქა და მეც სულ მინდოდა. ეს ოცნებაც ამიხდა. სერტიფიკატიც მაქვს. ყოველ საღამოს გამოვაღებ ფანჯარას, ავხედავ ცას და ვიცი იქიდან ჩემი სახელობის – თათო ვარსკვლავი კაშკაშებს და დამნათის. ზოგადად, ვთვლი, რომ ბედნიერ ვარსკვლავზე ვარ დაბადებული.

– ალბათ, უყურებ შენს ვარსკვლავს ცაზე და ბევრს ოცნებობ. რა არის შენი ცხოვრების მიზანი?

– არა, უფრო მიზანდასახული გოგო ვარ, ვიდრე მეოცნებე. ჩემი ცხოვრების მიზანია, ვიყო წარმატებული და გამომდიოდეს, რასაც დავგეგმავ. მაქსიმალურად ვიხარჯები, ვშრომობ, რომ ვიყო რეალიზებული და დასახულ მიზნებს მივაღწიო. ამაში იღბალიც მეხმარება. ყველგან ყურადღების ცენტრში ვარ და ვაღიარებ, ძალიან მსიამოვნებს. ჩემი უახლოესი მიზანია მაგისტრატურაში ჩაბარება და ჩემი საკუთარი ბიზნესის დაწყება.

– თათო, გყავს ერთი დაიკო, რომელიც შენზე უმცროსია და ძალიან გიყვარს. თუ ითვალისწინებს შენს, უფროსი დაიკოს, რჩევებს?

– ჩვენ შორის ათი წელია განსხვავება. ხუჭუჭა, ქერათმიანი დაიბადა. მისმა დაბადებამ სრულიად შეცვალა ჩემი ცხოვრება. დედა მუშაობდა და ანას ხშირად მიტოვებდა. ძალიან მიყვარს. 16 წლისაა და „ბაქსვუდის“ სკოლაში სწავლობს, რომელიც მე დავამთავრე. პროფესია ჯერ არ აურჩევია. საოცრად ლამაზი და ნიჭიერი გოგოა. არ მითქვამს მისთვის, მაგრამ გამიხარდება და მოუხდება კიდეც დიზაინის მიმართულებით თუ წავა.