„ვკითხე აუცილებელია, მე და გიორგიმ ჯვარი დავიწეროთ-მეთქი? პასუხმა გამაოცა“
ყოფილი პირველი ლედი, მაკა ჩიჩუა, “მერე პოდკასტის” ფარგლებში იხსენებს ილია მეორესთან შეხვედრას, რომელმაც მის წარმოდგენებში ბევრი რამ შეცვალა.
“პატრიარქთან შეხვედრა როგორ არ მახსოვს. იცით, როგორი პიროვნება იყო? ჩემსა და გიორგის ურთიერთობაზე დიდი აჟიოტაჟი იყო ატეხილი. ამბობდნენ, რომ პრეზიდენტს აუცილებლად ოფიციალური ცოლი უნდა ჰყავდეს, რეგისტრირებული ქორწინებით თუ ჯვარდაწერილი. სწორედ მაშინ გვითხრა, ჩემთან მოდითო.
მოგვიანებით, როცა მასთან ურთიერთობა მქონდა, ვკითხე: -რატომ მოხდა ასე, ძალიან დიდი თავდასხმა იყო და თქვენ იმავე დღეს გადაწყვიტეთ კარი გაგეღოთ-მეთქი.
რელიგიური თვალსაზრისით, შესაძლოა, ეთქვა, რომ ჯვრისწერა აუცილებელია. პირდაპირ ვკითხე: თქვენი აზრით, აუცილებელია, რომ მე და გიორგიმ ჯვარი დავიწეროთ-მეთქი?
მისმა პასუხმა გამაოცა: – არა, რა სისულელეაო.
მეგონა, მეტყოდა, რომ კარგი იქნებოდა ან მირჩევდა ამ ნაბიჯის გადადგმას, მაგრამ არა. მითხრა: – როცა მოგინდებათ და როცა ამის დრო მოვა, ამას თქვენ თვითონ იგრძნობთ. მთავარი ხომ სიყვარულიაო.
ეს იყო საოცრად ძლიერი ადამიანი, უდიდესი ცხოვრებისეული გამოცდილებით, რომელსაც უამრავი ტკივილი და სიხარული ჰქონდა გამოვლილი. სიმართლე გითხრათ, მისი ზოგიერთი ნაბიჯი არ მომწონებია და გამიკრიტიკებია კიდეც, თუმცა, უდავოა, რომ იგი იყო უძლიერესი პიროვნება, ბრწყინვალე პოლიტიკოსი, საოცარი დიპლომატი და კარგი იუმორის პატრონი.
თავისი დინჯი ხმით მეუბნება: – მაკა, როცა თქვენ გადაწყვეტთ, მაშინ შეძლებთ ამას, მანამდე კი თავად უნდა გაერკვიოთო. გაოგნებული ვუსმენდი”, – ამბობს მაკა ჩიჩუა.