“ჩემი გოგონასთვის ლამაზ კაბებს მე ვყიდულობ”

მომღერალ დათო ხუჯაძის ოჯახური ცხოვრება ბედნიერად გრძელდება პირველი წარუმატებელი ქორწინების შემდეგ. პანდემიის პერიოდში ის მუსიკოს ეკა დალაქიშვილზე დაქორწინდა, რამდენიმე თვის წინ კი მათ ქალიშვილი შეეძინათ – ილა. დათოს უფროს და უმცროს გოგონებს შორის ასაკობრივი სხვაობა 12 წელია.

– 12 წლის შემდეგ გახდით მეორედ მამა. როგორია ამჯერად მამობის სენტიმენტები?

– გარდა იმისა, რომ ეს არის დიდი პასუხიმგებლობა, მეორე შვილის დაბადებამ ახალი აზრი მისცა ჩემს ცხოვრებას. საერთოდ ვთვლი, რომ რაც უფრო მეტი შვილი გეყოლება, მით უკეთესია, მეც არ ვაპირებ ამაზე გაჩერებას.

– როგორ შეცვალა თქვენი ცხოვრება მეორედ დაოჯახებამ და ბავშვის დაბადებამ?

– ორმაგად გამაბედნიერა. როგორც უკვე აღვნიშნე, ჩემს ცხოვრებას კიდევ უფრო მეტი პოზიტივი, აზრი და ემოცია დაემატა.

– ილასთვის სათამაშოების, კაბების და სხვა აქსესუარების ყიდვა გსიამოვნებთ თუ ეს საქმე თქვენი ცოლის პრეროგატივაა?

– ბავშვების მაღაზიას გულგრილად ვერ ჩავუვლი. აუცილებლად შევალ და რამეს მაინც ვუყიდი. თუ საზღვარგარეთ ვარ, უფრო გამძაფრებული ინტერესი მაქვს საბავშვო მაღაზიების მიმართ. მიყვარს, როდესაც ჩემი გოგონასთვის ლამაზ კაბებს ვყიდულობ.

– ხასიათით მაინც ვისკენ იხრება, დედისკენ თუ მამისკენ?

– ხასიათს ბოლომდე ვერ გაიგებ, ჯერ პატარაა, თუმცა ჟინიანი არის.

– და ვინ არის ჟინიანი თქვენ ორში?

– ალბათ მე უფრო ვარ.

– უმღერით ხშირად?

– კი, მეც და ჩემი მეუღლეც. ვფიქრობ, რომ ბავშვს ძალიან მოსწონს ძველი ქართული სიღერები, ამ დროს ჩუმდება და იღიმება.

– ერთ მტკივნეულ თემას მინდა, შევეხო. რამდენიმე თვის წინ დაკარგეთ მამა. როგორ გადაიტანეთ ეს ტკივილი და იქნებ რაიმე გაიხსენოთ თქვენი მამაშვილობიდან?

– ჩვენ ძმაკაცური, მეგობრული და მამაშვილური ურთიერთობა გვქონდა. მადლიერი ვარ ყველაფრისთვის, რაც მისგან ვისწავლე. დღეს ვინც ვარ, თავიდან ბოლომდე მამის დამსახურებაა.

– მამათქვენი გამორჩეული იყო თავისი პროფესიითაც. ის გიშერის ყველაზე ცნობილი სპეციალისტი გახლდათ. თქვენც იცით ეს ხელობა?

– მამა ხელოვანი კაცი იყო. თუ თავისუფალი დრო მექნება, შეიძლება მეც შევიდე მის სახელოსნოში, მაგრამ ახლა ყველაფერი ხელუხლებელია. ყველაფერი ისეა მის სახელოსნოში, როგორც მამაჩემის დროს იყო.